Гамілія на Ўнебаўзяцце НПМ
Марыя, Маці Езуса Хрыста,
Бога чалавека, велічная Панна, таксама з’яўляецца адной з нас. Яна - Жанчына, Яна - Маці, Яна - Сястра… Незвычайнасць Яе асобы вынікае з незвычайнага Мацярынства, з
Яе незвычайнай пакоры, з яе проста незвычайнага даверу Божай волі, Божаму
Провіду. І незвычайнасць Яе асобы рэалізоўваецца ў звычайнай шэрай
штодзённасці.
Яе
звычайны адказ "няхай будзе воля Твая" стаў пачаткам незвычайнага жыцця і
незвычайнага Мацярынства. Незвычайнага, але адначасова вельмі звычайнага і
простага, уласцівага для звычайнай простай жанчыны. Жыцця поўнага
“звычайнасці”, але поўнага змагання, выпрабавання і цярпення.
Цяжка
казаць аб Марыі ўзгадваючы толькі яе
звычайнасць у жыцці; але таксама цяжка казаць пра Марыю катэгорыямі
незвычайнасці. Бо цудоўным і незвычайным было яе Беззаганнае зачацце, такім жа
было Яе Мацярынства, урэшце незвычайным і цудоўным было Яе Унебаўзяцце.
Яна
адзіная з усяго чалавецтва была без граху. Яна адзіная сярод усяго чалавецтва
не памерла, але з целам і душою была ўзятая да неба. Яна і толькі Яна адзіная
была ўзнесена да такой вялікай годнасці, вялікай і незвычайнай: да годнасці
Божай Маці. Таму вельмі цяжка казаць аб Марыі толькі катэгорыямі незвычайнасці,
каб не ўчыніць з Яе багіню, каб Яна ў нашым сэрцы ўспрымалася адэкватна. Бо Яна
таксама як і мы – Божае стварэнне.
Але
і звычайным чынам пра Яе цяжка казаць, каб не спрафанаваць, не прынізіць Яе Мацярынства,
Яе асобу, Яе жыцця, Яе святасці… Каб не зводзіць Яе асобу і яе жыццё да ўзроўню
толькі нашай шэрай рэчаіснасці, да ўзроўню нашай абыякавасці…
Дарагія!
Унебаўзяцце Найсвяцейшай Панны Марыі мы ўзгадваем заўсёды, калі молімся
прадапошняй таямнічкай Хвалебнай часткі ружанца. Гэтая падзея ў жыцці Найсвяцейшай Панны
з’яўляецца не толькі тым фактам, што Яе Сын Езус Хрыстус узносіць Яе да Хвалы
збаўленых у небе, да такой асаблівай хвалы, але праз гэтую таямніцу Ўнебаўзяцця
дае кожнаму з нас надзею, прадсмак, адчуванне таго, што нас чакае ў будучым… Што
будзе таксама і нашым удзелам, нашай прысутнасцю ў Божай хвале. Але з умовай,
што мы гэтага жадаем, жадаем вечнага шчасця, жадаем аглядаць Бога тварам у твар…
Сённяшняя
ўрачыстасць ёсць святам, у якім асаблівым чынам ушаноуваем Маці Хрыста. Бо Яе
Сын у якім мы ўсе адчуваем надзею нашага ўратавання і вечнага збаўлення, сам
асабіста Яе ўшанаваў.
Дарагі
брат і сястра! Калі хочаш, каб тваё
жыццё і твая вечнасць былі незвычайнымі на ўзор Найсвяцейшай Панны Марыі, то
проста прапаную табе наследваць звычайнасць жыцця Марыі, Яе простую пакорную
штодзённасць.
І
яшчэ адна рэч. Няварта шукаць чагосьці незвычайнага і шмат узнёслага ў нашым жыцці. Не такі яго
сэнс. Не думайце таксама, што для святасці патрэбна нейкая незвычайнасць ці
нейкія цуды ў нашым жыцці. Штосьці такое што моцна адрознівала б нас ад іншых.
Не. Не гэта патрэбна. Найсвяцейшая Панна Марыя сваёю асобаю паказвае як у жыцці
імкнуцца да святасці, а менавіта, перажываць кожны звычайны дзень, дзякуючы за
яго Богу і з пакораю выконваць Яго волю… Кожнага дня жыць і напаўняць сваё
сэрца дабром і праўдаю; жыць звычайна, бо толькі ў такой звычайнасці
заключаецца незвычайнасць жыцця і асобы Найсвяцейшай Панны Марыі. Амэн.
Comments
Post a Comment