Казанне на урачыстасць Звеставання Пана 2014

Дарагія браты і сёстры!

Сённяшняя ўрачыстасць адкрывае перад намі план Божага Збаўлення і з'яўляецца прадвесцем уцелаўлення Божага Сына. Першае чытанне з кнігі прарока Ісаі, якое мы з вамі чулі, ясна паказвае той будучы момант, які стане пераломным у гісторыі збаўлення: «Вось Дзева зачне і народзіць Сына, і дасць Яму імя Эммануэль, што значыць Бог з намі.»

Гэтыя словы нясуць у сабе вялікую надзею, што Бог выканае свае абяцанні не толькі адносна свайго выбранага народу, але Ягонае збаўленне ахопіць усе народы зямлі.Усе часы і эпохі. Праз таямніцу Уцелаўлення, якую Бог адкрывае чалавеку, Ён уваходзіць у чалавечую гісторыю амаль незаўважальна нічога пры гэтым не знішчаючы, толькі рассейваючы цемру безнадзейнасці.

Чалавеку, які да гэтуль невыразна бачыў сэнс свайго існавання, Бог прапануе веліч і годнасць, якая далёка пераўзыходзіць яго зямныя чаканні і надзеі, і дазваляе па-іншаму разумець і успрымаць жыццё: як асаблівы дар, бясцэнны дар, дзякуючы якому мы можам удзельнічаць у хвале дзяцей Божых.

Бог нічога істотна не змяняе ў нашым зямным жыцці. Ён толькі хоча, каб мы сталі сутворцамі Ягонай справы збаўлення і адкуплення. Каб мы навучыліся шанаваць кожнае жыццё пачынаючы ад свайго ўласнага.

Сённяшняя ўрачыстасць ставіць перад намі заданне: каб мы веруючыя хрысціяне імкнуліся фарміраваць сваё жыццё на ўзор Хрыстовага жыцця і толькі такім чынам чалавецтва можа адчуць і зразумець кім па сваёй сутнасці з'яўляецца Хрыстус і наколькі важнай з'яўляецца годнасць кожнай чалавечай асобы.

Папа Леон Вялікі адносна таямніцы Уцелаўлення казаў: «Сёння нарадзіўся нам Збаўца! Радуйцеся умілаваныя! Няма месца на смутак, калі нараджаецца жыццё... О, хрысціянін спазнай сваю годнасць! Ты стаў удзельнікам Божай натуры, пакінь жа старыя звычкі твайго прыніжэння і не вяртайся да іх ніколі».

Бог палюбіў чалавека нягледзячы на ўсе яго заганы і слабасці, і ў сваёй міласэрнасці схіліўся над чалавецтвам, якое нямела ратунку. Таямніца звеставання паказвае як моцна Бог палюбіў чалавека і ўзвысіў яго жыццё, паказваючы яго сэнс і веліч.

Аб гэтай праўдзе напіша папа Ян Павел ІІ у энцыкліцы Redemptor hominis, кажучы, што гэтая збаўчая падзея у Божым плане любові, адносна чалавека і яго жыцця, дасягнула вяршыні. Бог увайшоў у жыццё чалавека і як чалавек стаў суб'ектам гэтага жыцця, адным з міліярдаў, але Адзіным! Праз таямніцу Уцелаўлення Бог сфарміраваў вымярэнне чалавечага быту, які пажадаў надаць ад пачатку.

Дарагія! Таямніца сённяшняй урачыстасці адкрывае перад намі прыгажосць і годнасць чалавечага жыцця і адначасова раскрывае перад намі любоў Бога звернутую да чалавека. Божы Сын праз Уцелаўленне з'яднаўся з кожным чалавекам: жыў і выхоўваўся ў асяроддзі людзей, працаваў сваімі рукамі, думаў чалавечым розумам, меў чалавечую волю з якой рашуча дзейнічаў, гэтым жа чалавечым сэрцам любіў.

Калі нарадзіўся з Дзевы Марыі, то сапраўды стаў адным з нас, падобным да нас ва ўсім, апрача аднаго. Апрача граху.

Кожны з нас, дарагія браты і сёстры, у таямніцы свайго жыцця мае магчымасць спаткацца з Хрыстом. Гэтую здольнасць нам дае вера, якая злучае справы Боскія з людскімі. Прыняць таямніцу Уцелаўлення - гэта значыць так як Марыя прыняць Божую волю ў сваім жыцці : «Вось я, слуга Пана. Няхай мне станецца паводле твайго слова.»

 Тады можна ўбачыць прыгажосць чалавечай натуры, выразна убачыць намер Бога, які яе стварыў, аднавіў і узвялічыў. І хоць заўважаем слабасць і грэшнасць сваёй чалавечай натуры, то ў Звеставанні перад намі адкрываецца новая перспектыва, невядомая яшчэ да гэтуль: «Для Бога няма нічога немагчымага». Амэн.